भुसावळ /जळगाव दि-30/11/2025, भुसावळ नगरपरिषदेतील प्रभाग क्रमांक ४ ‘ब’, ५ ‘ब’ आणि ११ ‘ब’ या तीन प्रभागांच्या निवडणूक प्रक्रिया राज्य निवडणूक आयोगाच्या निर्देशानुसार पुढे ढकलण्यात आल्या आहेत. याबाबतचे आदेश निवडणूक निर्णय अधिकारी तथा उपविभागीय अधिकारी जितेंद्र पाटील यांनी दिले आहेत.
राज्य निवडणूक आयोगाने ४ नोव्हेंबर २०२५ रोजी राज्यातील २४६ नगरपरिषदा व ४२ नगरपंचायतींसाठी निवडणूक कार्यक्रम जाहीर केला होता. मात्र नामनिर्देशनपत्र छाननीनंतर दाखल झालेल्या अपिलांवर जिल्हा न्यायालयाने २२ नोव्हेंबर २०२५ नंतर म्हणजे २३ नोव्हेंबर किंवा त्यानंतर निकाल दिल्याने उमेदवारांना नामनिर्देशनपत्र माघारी घेण्यासाठी पुरेसा वेळ मिळाला नाही. त्यामुळे काही प्रभागांमध्ये २६ नोव्हेंबर रोजी केलेले निवडणूक चिन्ह वाटप नियमबाह्य ठरले.
या पार्श्वभूमीवर राज्य निवडणूक आयोगाने २९ नोव्हेंबर २०२५ रोजी नवीन आदेश जारी करून अशा बाधित प्रभागांच्या निवडणुका स्थगित केल्या असून सुधारित वेळापत्रक जाहीर केले आहे.
1)भुसावळमधील सुधारित निवडणूक वेळापत्रक (फक्त प्रभाग ४-ब, ५-ब, ११-ब):
2)निवडणूक कार्यक्रम जारी करण्याची तारीख : ०४ डिसेंबर २०२५
3)नामनिर्देशनपत्र मागे घेण्याचा अंतिम दिनांक : १० डिसेंबर २०२५ (दुपारी ३.०० वाजेपर्यंत)
4)निवडणूक चिन्ह वाटप व अंतिम उमेदवार यादी प्रसिद्धी : ११ डिसेंबर २०२५
5)मतदान (आवश्यक असल्यास) : २० डिसेंबर २०२५ (सकाळी ७.३० ते सायंकाळी ५.३०)
6)मतमोजणी व निकाल जाहीर : २१ डिसेंबर २०२५ (सकाळी १०.०० वाजल्यापासून)
7)शासन राजपत्रात निकाल प्रसिद्धी : २३ डिसेंबर २०२५ पूर्वी
उमेदवारांच्या निवडणूक खर्चाची मर्यादा मात्र पूर्वीप्रमाणेच राहणार आहे. उर्वरित प्रभागांच्या निवडणुका यापूर्वीच्या कार्यक्रमानुसार पूर्ण झाल्या असून फक्त वरील तीन प्रभागांचाच नवीन कार्यक्रम लागू आहे.
